Kıblegâhım Kâbe'dir maksûd ü ma'bûdum ilâh
Kavlime ikrârıma ceddim Peyamber'dir güvâh
Bîgünâhım cümle edyân u milelde bîgünâh
İntisâbımdır günâhım var ise Peygambe're

Ehl-i Hakk'ı şâmiyân öldürmeyin nâhak yere
Görmeyin bu zulmü câiz hânedân-ı Hayder'e

Bildiniz mi ben kimem çeşm-i çerâğ-ı Hayder'em
Bida'-i pâkize-i hâtûn-i rûz-i mahşerem
Nev-gül-i gülşenserây-ı Hazret-i Peyamber'em
Yok mudur îmânınız eyâ o vâlâ gevhere

Ehl-i Hakk'ı şâmiyân öldürmeyin nâhak yere
Görmeyin bu zulmü câiz hânedân-ı Hayder'e

Katlimin esbâbını îzâh edin eyâ nedir
Mevc-i deryâ gibi leşkerle bu sahrâ nedir
Bir nefer-i mazlûmu öldürmekde bu kavgâ nedir
Ben ki mevte teşneyim hâcet mi var bu leşkere

Ehl-i Hakk'ı şâmiyân öldürmeyin nâhak yere
Görmeyin bu zulmü câiz hânedân-ı Hayder'e

Mültezemse tâ'at-i emr-i Yezîd-i bî-hayâ
Etmeyin benden ümmîd anı ey ehl-i hevâ
Uktulûnî uktulûnî bi'l cefâi ve'l ezâ
Davranın ey zâlimân şemşîr ü tîr ü hançere

Ehl-i Hakk'ı şâmiyân öldürmeyin nâhak yere
Görmeyin bu zulmü câiz hânedân-ı Hayder'e

Sâlihim fısk u fücûru irtikâb eyler miyim
Fâsık ü fâcir Yezîd'e intisâb eyler miyim
Dîn-i tersâ üzre ben şurb-i şerâb eyler miyim
Ben Ali evlâdıyam küfre müdânâ eyler miyem

Ehl-i Hakk'ı şâmiyân öldürmeyin nâhak yere
Görmeyin bu zulmü câiz hânedân-ı Hayder'e

Bâtılı tasdîk edüb de hakkı inkâr eylemem
Kendimi fermânber-i serdâr-ı eşrâr eylemem
Rûh-i pâk-i Ahmed'i mahzûn u bîzâr eylemem
Tâbîim her vechile ahkâm-ı şer'-i envere

Ehl-i Hakk'ı şâmiyân öldürmeyin nâhak yere
Görmeyin bu zulmü câiz hânedân-ı Hayder'e

Vâlî-yi Şâm oğluna bî'at muhâl ender muhâl
Pâre pâre etseniz de yok bu emre ihtimâl
İşte meydân işte ben lâzım değildür kîl ü kâl
Hiç terahhüm etmeyin bu bîkes ü bîyâvere

Ehl-i Hakk'ı şâmiyân öldürmeyin nâhak yere
Görmeyin bu zulmü câiz hânedân-ı Hayder'e

Eyleyin katlimde isti'câl nâ-merdân-ı Şâm
Hep edin icrâya bu fi'l-i fecî'i ihtimâm
Muntazırdır rûhum istikbâle hayyu'l enam
Hûn-çekân girsem gerek bezm-i huzûr-i dâvere

Ehl-i Hakk'ı şâmiyân öldürmeyin nâhak yere
Görmeyin bu zulmü câiz hânedân-ı Hayder'e

İ'tilâ-yı rûhumu ehl-i semâvât istiyor
Enbiyâ evliyâ feyz-i mülâkât istiyor
Da'vâ-yı aşka habîbim benden sebât istiyor
Nakd-i cândır pişkeş-i ma'şûk-i âş-pervere

Ehl-i Hakk'ı şâmiyân öldürmeyin nâhak yere
Görmeyin bu zulmü câiz hânedân-ı Hayder'e

Oğlumun al kânına mahlût edin gözyâşımı
Öldürün evlâdımı dâmâdımı kardâşımı
Cedd-i pâkim nîzelerde görmek ister bâşımı
Hoş gelir hâlim bu sûretle cenâb-ı Hayder'e

Ehl-i Hakk'ı şâmiyân öldürmeyin nâhak yere
Görmeyin bu zulmü câiz hânedân-ı Hayder'e

Durmasın fâsık Yezîd islâmı mahzûn eylesin
Hâmilân-ı Hazret-i Kur'ân'ı dilhûn eylesin
Gökleri aksiyle tâbe mahşer şafakgûn eylesin
Bu mukaddes cismimin akdıkça kânı yerlere

Ehl-i Hakk'ı şâmiyân öldürmeyin nâhak yere
Görmeyin bu zulmü câiz hânedân-ı Hayder'e

Katlimi kanlı yazıyla anlıma yazmış felek
Teşne-leb tîğ-i ihânetle şehîd olsam gerek
Âl-i Sufyân'da bu neng ü âr kalsun haşra dek
Kim peyamber oğlunu öldürdüler nâhak yere